Məhsul kodu: 9665
Kitabda Azərbaycan adının anlamı, tarixi ərazisi, milli azadlıq hərəkatını doğuran amillər, onun mənbələri, dövrləri və cərəyanlarından bəhs olunur. Bundan başqa tarixşünaslığımızda ilk dəfə olaraq bu kitabda milli azadlıq hərəkatının dövrləri dəqiqləşdirilmiş, onun dörd dövrdən ibarət olduğu müəyyənləşdirilmiş, hər bir dövrün başlandığı və qurtardığı illər, bu illərin əsas xüsusiyyətləri elmi cəhətdən əsaslandırılmışdır. Eyni zamanda kitabda ilk dəfə olaraq M.Ə.Rəsulzadənin və M.B.Məmmədzadənin əsərlərinin həm milli azadlıq hərəkatı problemlərinin öyrənilməsində, həm də bütövlükdə Azərbaycan tarixinin konsepsiyasının düzgün qiymətləndirilməsi, müəyyənləşdirilməsindəki yeri və rolu təhlil edilmişdir. Keçən əsrin 1905-1907-ci illəri və 1917-ci ildən sonra milli azadlıq hərəkatındakı cərəyanlar, onların əsas prinsipləri, oxşar və fərqli cəhətlərinin müqayisəli elmi təhlili, Rusiya əsiri türklərin milli mücadiləsində Azərbaycan siyasi xadimlərinin yeri və rolu da kitabın maraqlı səhifələrindəndir. Problemlə bağlı ilk dəfə tərtib edilən cədvəllər də oxuculara mövzunu daha yaxşı öyrənməyə kömək edəcək. Bütün bunlardan sonra gəlinən nəticə ondan ibarətdir ki, Azərbaycan Cümhuriyyəti təsadüfən, Rusiya imperiyasının dağılmasından sonra avtomatik olaraq meydana gəlməyib, rus bolşevikləri və erməni daşnakları tərəfindən soyqırımına məruz qalaraq çoxsaylı qurbanlar verməsinə baxmayaraq istiqlal yolundan geri çəkilməməsindən, ağır, məşəqqətli, ancaq şərəfli milli azadlıq mübarizəsindən sonra yaranmışdır.
